Skipulags- og mannvirkjanefnd

Viðhaldsáætlun Ísafjarðarbæjar 2027 - 2037 er lögð fram til síðari umræðu í skipulags- og mannvirkjanefnd. Að lokinni umfjöllun nefndarinnar er lagt til að viðhaldsáætluninni verði vísað til bæjarráðs til fyrri umræðu.

Framkvæmdaáætlun Ísafjarðarbæjar 2027-2037 er lögð fram til síðari umræðu í skipulags- og mannvirkjanefnd. Að lokinni umfjöllun nefndarinnar er lagt til að framkvæmdaáætluninni verði vísað til bæjarráðs til fyrri umræðu.

Á 174. fundi umhverfis- og framkvæmdanefndar, þann 19. október 2026, var tekið fyrir erindi frá Páli Janusi Þórðarsyni fyrir hönd Akstursíþróttadeildar Vestra dagsett 3. júní 2026, varðandi uppbyggingu akstursíþróttasvæðis á Seljalandsdal. Á 45. fundi skóla-, íþrótta- og tómstundanefndar var erindinu vísað til umhverfis- og framkvæmdanefndar til umsagnar.

Umhverfis- og framkvæmdanefnd benti á að svæðið er utan vatnsverndarsvæðis en það er á innan svæðis náttúruminjaskrár og það ber að taka tillit til þess við framkvæmdir á svæðinu. Málinu er nú vísað til frekari afgreiðslu í skipulags- og mannvirkjanefnd.

Á 679. fundi skipulags- og mannvirkjanefndar, þann 29. september 2026, óskaði nefndin eftir afstöðu íbúasamtakanna Átaks vegna landnotkunar á Þingeyri vegna erindis frá Katli Berg Magnússyni, dags. 21. september 2026 þar sem óskað er eftir því að endurskoða landnotkun í vinnslutillögu Aðalskipulags Ísafjarðarbæjar 2025-2050 á Þingeyri.

Óskin sneri að því að strandsvæðið frá Tanknum við Sjávargötu út fyrir Skjólvík verði merkt opið svæði (OP) í vinnslutillögunni áður en hún fer til afgreiðslu í skipulags- og mannvirkjanefnd, með mörk miðsvæðis við Tankinn og Fjarðargötu 42 sem VÞ.

Nú er lögð fram umsögn íbúasamtakanna Átaks/hverfisráðs Þingeyrar, dags. 5. október 2026.

Lagt fram erindi frá einum af þinglýstum eigendum við Neðsta-Hvamm 3b í Dýrafirði, þar sem óskað er eftir heimild Ísafjarðarbæjar til að hefja vinnu við nýtt deiliskipulag í landi Hvamms, fyrir eitt frístundahús og tvö gestahús, ásamt aðkomu og veitum.
Jafnframt er lögð fram skipulagslýsing unnin af M11 arkitektum, vegna fyrirhugaðrar uppbyggingar á parti 3 Neðsta-Hvamms 3B í Dýrafirði, dags. 22. september 2026.

Lögð fram tilkynning frá HMS, með kynningu á Skipulagsdeginum 2026 sem fer fram þann 5. nóvember, kl 9-16 í Háteig á Grandhótel og í beinu streymi.

Dagskrá dagsins skiptist niður í fjóra hluta:
Samþætting skipulagsmála og húsnæðisáætlana
Staða og þróun skipulagsmála og landnýtingar
Aðlögun byggðar að loftslagsbreytingum
Menningarlandslag, ásýnd byggðar í dreifbýli og þéttbýli

Í lok hvers hluta verða pallborðsumræður og tekið við spurningum úr sal. Fjölbreyttur hópur frummælenda og sérfræðinga mun koma að pallborðsumræðum.
Fagfólk, kjörnir fulltrúar og allt áhugafólk um skipulag er hvatt til að taka daginn frá.

Lagt fram erindi frá innviðaráðuneytinu, dags. 8. október 2026, þar sem kynnt er til samráðs mál nr. 205/2026 „Drög að reglugerð um þjónustustöðvar björgunarfleka“.

Umsagnarfrestur er til og með 28. október 2026.

Lagt fram til kynningar, erindi frá Jóhanni Egilssyni hjá Snerpu ehf. dags. 6. október 2026, með ósk um leyfi frá Ísafjarðarbæ sem eiganda að jörðinni Tungu í Skutulsfirði til lagningar ljósleiðara að Tungudalsvirkjun annars vegar og hins vegar að barnalyftu á skíðasvæðinu í Tungudal.